Azərbaycan Respublikasının Xalq artisti, Prezident təqaüdçüsü, tanınmış tarzən Fikrət Süleyman oğlu Verdiyev 75 yaşında vəfat edib.
Fikrət Verdiyev 1947-ci il sentyabrın 2-də Gəncə şəhərində anadan olub. 1957-1962-ci illərdə Gəncə şəhər 1 saylı musiqi məktəbində tar sinfində oxuyub. 1962-ci ildə məktəbi bitirərək Qəmbər Hüseynli adına Gəncə orta ixtisas musiqi məktəbində təhsil almağa başlayıb.
Təhsil illərində bir sıra özfəaliyyət kollektivlərinə rəhbərlik etməyə başlamışdır. 1966-cı ildə Gəncədə təhsilini başa vuraraq Azərbaycan Dövlət Konservatoriyasına daxil olub. 1969-cu ildə Gəncədə istedadlı musiqiçiləri bir araya toplayaraq “Göygöl” Dövlət Mahnı və Rəqs Ansamblını yaradıb.
Fikrət Verdiyev daim öz sənəti ilə milli ifaçılığımızın ənənələrini qorumağa, özünəməxsus ifa üslubu yaratmağa nail olmuş, böyük dinləyici rəğbəti qazanıb. Məharətlə ifa etdiyi muğamlar, xalq və bəstəkar mahnıları minlərlə dinləyicinin qəlbində silinməz iz buraxıb.
Azərbaycanın görkəmli sənətkarı, Xalq artisti, tarzən Fikrət Verdiyevin vəfatından kədərləndiyimizi bildirir və mərhumun yaxınlarına dərin hüznlə başsağlığı veririk.
Allah rəhmət eləsin!