Son illər müstəqil Azərbaycan dövlətinin əldə etdiyi böyük uğurlar, Prezident cənab İlham Əliyevin uğurlu diplomatiyası ölkəmizi Cənubi Qafqaz regionunun ən etibarlı tərəfdaşına çevrib. Bu gün dünyanın siyasi arenasında hörməti günü gündən artan Azərbaycanın bir çox dövlətlərlə, həmçinin Mərkəzi və Şərqi Avropa ölkələri ilə strateji tərəfdaşlq, səmimi dostluq-qardaşlıq münasibətləri yüksək səviyyədə davam edir.
Bu sözləri YAP Gəncə şəhər təşkilatının sədri Ramil Orucov bildirib. O, qeyd edib ki, Prezident cənab İlham Əliyevin noyabrın 15-də Albaniyaya ilk səfəri də ölkəmizin ikitərəfli və çoxtərəfli əməkdaşlığına xidmət edib. Dövlət Başçımızın Albaniya səfəri həm də iki ölkə arasında yüksək səviyyədə olan əlaqələrin daha da inkişafına, gücləndirilməsinə çox əlverişli imkanlar yaratdı. Səfər çərçifəsində , Prezident cənab İlham Əliyevin Albaniya Prezidenti Bayram Beqay və Baş nazir Edi Rama ilə keçirilən görüşlərdə müzakirə edilən məsələlər iki ölkə arasında yüksələn xətlə davam edən diplomatik münasibətlərə, reallaşdırılan birgə layihələrə töhfə oldu.
Azərbaycan ilə Albaniyanın “Cənub qaz dəhlizi”nin sonuncu seqmenti olan Trans-Adriatik Boru Kəmərinin (TAP) həyata keçirilməsində uğurla əməkdaşlığı iki ölkənin iqtisadi əlaqələrin əsas istiqamətidir.
2020-ci ilin 31 dekabr tarixindən qazının nəqlinə başlanılan TAP boru kəmərinin tikinti işlərində Albaniya podratçı şirkətləri yaxından iştirak ediblər. TAP layihəsi ümumilikdə Albaniyaya 1,5 milyard avro dəyərində sərmayə yatırdıb. Layihə ömrü ərzində (tikinti və 25 il istismar mərhələsi dövründə) ölkəyə gözlənilən vergi ödənişlərinin həcmi 285 milyon avro dəyərindədir.
Ramil Orucov onu da qeyd edib ki, 2022-ci ilin yanvar-sentyabr aylarında Albaniya Azərbaycanın 86-cı xarici ticarət tərəfdaşı olub. Ölkələrimiz arasında ticarət dövriyyəsinin həcmi 1,45 milyon dollar, o cümlədən idxalın həcmi 1,14 milyon, ixracın həcmi 0,31 milyon dollar təşkil edib.
Hazırda “Cənub qaz dəhlizi”nin ayrılmaz hissəsi olan TAP və TANAP qaz kəmərlərinin iki dəfə genişləndirilməsi məsələsi müzakirə olunur. Bu da onu göstərir ki, Azərbaycan Avropa İttifaqı rəsmiləri tərəfindən artıq etibarlı tərəfdaş kimi tanınır və qiymətləndirilir. Ölkə Prezidentimiz cənab İlham Əliyev Albaniyada çıxışı zamanı Azərbaycanın həmçinin Albaniyada qaz təsərrüfatının inkişafına da töhfə verə biləcəyini qeyd edərək bildirib ki, bu ölkədə indiyədək qaz şəbəkəsi yaradılmayıb. Azərbaycan bu sahədə də investor kimi iştirak edə bilər və buna hazırdır. Azərbaycan da öz növbəsində 2027-ci ilə qədər Avropaya qaz təchizatını iki dəfə artırmaq fikrindədir. Avropanın enerji təhlükəsizliyinə əlavə dəstək verəcək təbii qaz eyni zamanda Albaniya ərazisindən keçəcək.
Ölkə Prezidentimiz İlham Əliyevin Albaniyaya ilk səfəri iki ölkə arasında əməkdaşlıqda yeni səhifələr açdı, əlaqələrin yüksək səviyyədə inkişafına, gücləndirilməsinə çox əlverişli imkanlar yaratdı – deyə YAP Gəncə şəhər təşkilatının sədri Ramil Orucov bildirib.