Fransanın paytaxtında Karate1 Premyer Liqasının “Paris Open” mərhələsində çənəsi və burnundan iki zədə alan milli komandanın lideri rafael Ağayev bu nüfuzlu turniri gümüş medalla başa vurub.
Beləliklə də Rafael Ağayev (-75 kq) 2019-cu il mövsümünə medalla başlayıb.
Modern.az-ın məlumatına görə, R.Ağayev həm də Dünya Karate Federasiyasının (WKF) ötən mövsümün ən yaxşı idmançıları üçün təsis etdiyi “Grand Winners”in mükafatçılarından biri olub. Namizədlərə mükafatları Yaponiyanın Fransadakı səfiri Masato Kitera və WKF-in prezidenti Antonio Espinos, həmçinin təşkilatın baş katibi Toşixisa Naqura təqdim edib.
Yarışda iştirak edən milli komandanın digər üzvlərindən Firdovsi Fərzəliyev (-60 kq), Rafiz Həsənov (-67 kq), Turqut Həsənov, Pənah Abdullayev (ikisi də -84 kq) və Nuranə Əliyeva (-50 kq) təsəlliverici görüşlərə qatılsalar da, nəticədə medal qazanmaq şansının əldən veriblər.
“Kiçik dünya çempionatı” adlandırılan “Paris Open” turnirində 82 ölkədən 776 idmançı iştirak edib. Beynəlxalq hakim Cahangir Babayev, məsul final görüşlərini idarə edən referilər arasında olub. Karateçilərimizin növbəti rəsmi yarışı fevralın ortaları Karate1 Premyer Liqasının Dubay mərhələsi olacaq.