Gəncə-Daşkəsən Regiolan Gənclər və İdman İdarəsinin təşkilati dəstəyi ilə Gəncə Regional Voleybol Klubu Qərb bölgəsinin şəhər və rayonlarından olan yeniyetmə voleybolçuları bir araya toplayıb. Gəncə Olimpiya Kompleksində baş tutan tədbirdə klubun Gəncə, Mingəçevir və Naftalan şəhərlərindən, həmçinin Daşkəsən, Goranboy və Samux rayonlarından olan üzvləri iştirak ediblər.
Əvvəlcə Gəncə Regional Voleybol Klubunun fəaliyyətindən söz açılıb. Bildirilib ki, Azərbaycan Voleybol Federasiyasının nəznində yaradılmış Gəncə Regional Voleybol Klubu 2 aydır ki, fəaliyyət göstərir. Gəncə şəhərində klubun məşqləri ATU, ADAU və 31 nömrəli tam orta məktəbin idman zallarında keçirilir.
Ümumilikdə 70 yeniyetmə voleybolçunun qatıldığı görüşdə klub üzvlərinin məşq prosesi də izlənilib.
Hazırda Qərb bölgəsinin 6 şəhər və rayonunda fəaliyyət göstərən Gəncə Regional Voleybol Klubunun əhatə dairəsinin 15 şəhər və rayona çatdırılması nəzərdə tutulub.
