Heyvandarlıq Elmi Tədqiqat İnstitutunun nümayəndələri Hindistan Respublikasının Azərbaycanda yerləşən səfirliyinə rəsmi səfər ediblər.
Hindistan səfirinin vəzifələrini icra edən cənab P. K. Qovindanla görüş zamanı HETİ-nin direktoru, dosent Mahir Hacıyev iki ölkə arasında qədim zamanlardan davam edən dostluq və əməkdaşlıq əlaqələrinin heyvandarlığın elmi inkişafı sahəsində davam etdirilməsinin müsbət nəticələr verəcəyini vurğulayıb.
Görüşdə Hindistanın son illərdə aqrar sahədə qazandığı nailiyyətlərin dünya praktikasında özünəməxsus yer tutmasından bəhs olunb. Qeyd olunub ki, Heyvandarlıq Elmi Tədqiqat İnstitutu Hindistanın elmi-tədqiqat institutları ilə birgə tədqiqat aparmaq və elmi sahədə əldə edilmiş təcrübəni paylaşmağa hazırdır. Heyvandarlığın camışçılıq, quşçuluq, ipəkçilik sahələrində əməkdaşlığın hər iki ölkə üçün çox faydalı olacağı vuğulanıb. Xüsusilə, Hindistanda olan yüksək məhsuldar camış cinslərinin Azərbaycana gətirilməsi və uyğunlaşdırılması, iki ölkə alimlərinin birgə elmi tədqiqat işlərini yerinə yetirməsi, təcrübə mübadiləsi aqrar sahəyə müsbət töhfəsini verəcək.
Cənab P. K. Qovindan öz növbəsində institutun əməkdaşları ilə tanışlığına şad olduğunu və ölkələr arasında elmi əməkdaşlığın qurulması təşəbbüsünü dəstəklədiyini bildirib. Yaxın zamanda Heyvandarlıq Elmi Tədqiqat İnstitutuna səfər edəcəyinə söz verən katib, Heyvandarlıq Elmi Tədqiqat İnstitutunun əməkdaşlıq təklifini dəyərləndirəcəklərini və Hindistanın Kənd Təsərrüfatı nazirliyi vasitəsi ilə əməkdaşlığın qurulmasına dəstək olacağını bildirib.