Azərbaycan Respublikası Milli Məclisinə növbədənkənar seçkilər Gəncə şəhərində yaradılmış 4 dairə seçki komissiyası üzrə fəaliyyət göstərən məntəqələrdə də seçici fəallığı ilə davam edir.
38 saylı Gəncə birinci, 39 saylı Gəncə ikinci, 40 saylı Gəncə üçüncü və 41 saylı Gəncə-Samux-Goranboy seçki dairələri fəaliyyət göstərir. Şəhər üzrə 133 seçki məntəqəsi fəaliyyət göstərir, səsvermə hüququ olan vətəndaşların sayı isə 181090 nəfərdir.
Gəncə sakini Eldar Zeynalov səsvermə hüququndan istifadə edən seçicilərdən biridir. O, növbədənkənar parlament seçkilərində səsvermə prosesində iştirak etməklə konstitusion hüququndan istifadə edib və istədiyi namizədə səs verib. Hər hansı çətinliklə qarşılaşmadığını və sərbəst şəkildə seçim etdiyini vurğulayıb.
Bütün seçki məntəqələrində seçkilərin demokratik, şəffaf və ədaləti keçirilməsi üçün lazımi şərait yaradılıb. Məntəqələr zəruri texniki vasitə və metodiki vəsaitlərlə, elektrik enerjisi, rabitə şəbəkəsi və yanğın təhlükəsizliyi avadanlıqları ilə təmin olunub. Seçicilərin öz mövqelərini sərbəst ifadə etmələri üçün kabinələr quraşdırılıb. Seçki məntəqələrində katib və üzvlər, habelə seçkini izləyəcək müşahidəçilər üçün yerlər müəyyənləşdirilib.
“Mən də səsvermədə iştirak etdim və öz namizədimə səs verdim. Ümid edirəm ki, bu seçkilər ölkəmizin daha da çiçəklənməsinə töhfə verəcək”, – deyə şəhər sakini Ülkər Yusubova təəssüratlarını bölüşüb.
Qeyd edək ki, ilk dəfədir Azərbaycanın bütün suveren ərazilərində Milli Məclisə seçkilər keçirilir. Növbədənkənar seçkilər 6478 seçki məntəqəsində təşkil olunur. Onlardan 6343-ü daimi, 135-i isə müvəqqətidir.
Budəfəki seçkilərdə 125 mandat uğrunda 990 namizəd mübarizə aparır. Namizədliyi qeydə alınan 305 nəfər 25 siyasi partiyanın nümayəndəsidir.
Parlament seçkilərində 6 milyon 421 min 960 vətəndaş səsvermə hüququndan istifadə edə biləcək. İşğaldan azad olunmuş ərazilərdə səsvermə hüququna malik 42 mindən artıq seçicinin konstitusion hüquqlarını reallaşdırmaları üçün 54 seçki məntəqəsi yaradılıb.
Seçki günü 18 yaşı tamam olan seçicilərin sayı 374, Milli Məclisə seçkilərdə səsvermədə ilk dəfə iştirak edəcək seçicilərin sayı isə 51 min 141 nəfərdir.
Seçkiləri izləmək üçün 51 beynəlxalq qurum və 69 ölkədən olmaqla, 598 beynəlxalq müşahidəçi akkreditasiyadan keçib. Yerli müşahidəçi kimi isə 112 min 749 nəfər qeydə alınıb.
Ölkə ərazisində 1000 seçki məntəqəsində veb-kameralar quraşdırılıb.
Səhər 08:00-da başlayan səsvermə saat 19:00-da başa çatacaq.