Milli Məclisin deputatları Naqif Həmzəyev və Pərvin Kərimzadə MDB-yə üzv dövlətlərin Rusiya Federasiyasının paytaxtı Moskvada keçirilən Yaradıcı və Elmi Ziyalıların XII Forumunda iştirak ediblər.

İki gün davam edən Forumda MDB ziyalıları “MDB-də ailə dəyərlərinin və ənənələrinin möhkəmləndirilməsi və dəstəklənməsində humanitar əməkdaşlığın rolu” mövzusunda müzakirələr aparıb, quruma üzv dövlətlərin elm və təhsil sahəsində əməkdaşlığı, gənclər siyasəti, MDB-də mədəniyyət ilinin keçirilməsi istiqamətində nəzərdə tutulan tədbirlər və digər məsələlər ətrafında fikir mübadiləsi aparıblar.

Millət vəkili Pərvin Kərimzadə ölkəmizdə təhsil sistemində müasir infrastrukturun yaradılmasından, təhsilin inkişafı istiqamətində atılan mühüm addımlardan danışaraq bildirib ki, bu gün Azərbaycanda məhz bu istiqamətləri əhatə edən dövlət siyasəti aparılır, iqtisadi potensialı intellekt kapitalına çevirmək sahəsində mühüm işlər görülür.

“Azərbaycan gəncləri mədəniyyət, incəsənət, idman, elm, təhsil, texnologiya və başqa sahələrdə öz istedadlarını, qazandıqları uğurları layiqincə nümayiş etdirirlər. Hər bir perspektivli Azərbaycan gəncinin yetişməsi üçün ölkədə dövlət tərəfindən lazımi şərait yaradılıb. Azərbaycan dövləti nəinki özünün siyasətində gənclərə üstünlük verir, bu istiqamətdə siyasəti prioritet fəaliyyət kimi, gənclərin bilavasitə iştirakı ilə formalaşdırıb həyata keçirir”- millət vəkili Naqif Həmzəyev Forumdakı çıxışında bildirib.

Millət vəkilləri Azərbaycanın Rusiyadakı səfirliyində ümummilli lider Heydər Əliyevin anım mərasimində iştirak edib, ulu öndərin səfirliyin binasındakı barelyefinin önünə tər çiçəklər düzərək, onun xatirəsini bir dəqiqəlik sükutla yad ediblər.

Anım mərasimi çərçivəsində Heydər Əliyev Fondunun dəstəyi ilə bu il Moskvada nəşr olunan üç cildlik “Heydər Əliyev:Şəxsiyyət və Zaman” adlı kitabının təqdimat mərasimi keçirilib.