2017/2018-ci tədris ilində magistraturaya qəbul imtahanında iştirak etmək üçün ümumilikdə 13081 (ötən il 24110) bakalavr qeydiyyatdan keçmişdir.

Dövlət İmtahan Mərkəzindən verilən məlumata görə, bu il ali təhsil müəssisələrinin magistratura səviyyəsinə 7703 plan yeri ayrılmış və müsabiqənin nəticələrinə əsasən, 6361 bakalavr (Azərbaycan bölməsi üzrə 5826, rus bölməsi üzrə 535) magistratura səviyyəsinə qəbul olunmuşdur. Onlardan 2358 nəfəri dövlət sifarişi əsasında təhsil almaq hüququ əldə edib.  Ali təhsil müəssisələrinə qəbul planı 82.58 % dolub. 1342 plan yeri (17.42 %)  boş qalmışdır. Xatırladaq ki, 2016/2017-ci tədris ilində plan yerlərinin dolma faizi 63.39%  olub. Bu il bu göstərici  daha da yaxşılaşıb və plan yerlərinin dolma faizi ötən illə müqayisədə ərizə verənlərin sayının az olmasına baxmayaraq təqribən 19% artıb.

Müsabiqənin nəticələrinə əsasən, Azərbaycan Tibb Universitetində, Azərbaycan Respublikasının Prezidenti yanında Dövlət İdarəçilik Akademiyasında, Bakı Musiqi Akademiyasında, Azərbaycan Dövlət Bədən Tərbiyəsi və İdman Akademiyasında,  Fövqəladə Hallar Nazirliyinin Akademiyasında plan yerləri tam, Bakı Dövlət Universiteti, Azərbaycan Dövlət Neft və Sənaye Universiteti, Azərbaycan Dövlət Pedaqoji Universiteti, Azərbaycan Dövlət İqtisad Universiteti,  Azərbaycan Dövlət Rəssamlıq Akademiyası, Azərbaycan Turizm və Menecment Universiteti, Milli Aviasiya Akademiyası, Mingəçevir Dövlət Universitetinin plan yerləri 90 faiz və daha çox dolub.

Magistraturaya qəbulda plan yerlərinin dolma göstəricisi üzrə ən zəif nəticə Bakı İslam Universitetinə (8.33%)  aiddir.

Magistraturaya qəbul olmuş bakalavrların qeydiyyatı avqust ayının 17-dən 25-dək (şənbə və bazar günləri istisna olmaqla) saat 10:00-dan 17:00-dək aparılacaq. Qeydiyyatdan keçməyən bakalavrlar qəbul olunanların siyahısından xaric ediləcəklər.