Gəncə Şəhər Təhsil İdarəsində “5 Oktyabr – Beynəlxalq Müəllimlər Günü” münasibətiylə tədbir keçirilib. Tədbirdə Gəncə Şəhər İcra Hakimiyyəti başçısının müavini Vəfa Abbasova, şəhər Təhsil İdarəsinin müdiri Zakir Hüseynov və təhsil işçiləri iştirak ediblər.
Gəncə Şəhər Təhsil İdarəsinin müdiri Zakir Hüseynov tədbiri giriş sözü ilə açaraq müəllimləri peşə bayramı günü münasibəti ilə təbrik edib. Zakir Hüseynov respublikada təhsilin maddi-texniki bazasının möhkəmləndirilməsi istiqamətində görülən işlərdən danışıb. Bildirib ki, son illərdə Gəncədə təhsil sistemində qazanılan uğurları məhz bu sahəyə Prezident İlham Əliyev və Birinci Vitse Prezident Mehriban xanım Əliyeva tərəfindən göstərilən diqqət və qayğının nəticəsidir. O vurğulayıb ki, bu il Heydər Əliyev fondunun təşəbbüsü ilə Gəncədə 18 və 34 nömrəli məktəblər əsaslı təmir edilib. Zakir Hüseynov təhsilə göstərdiyi yüksək diqqət və qayğıya görə ölkə rəhbərinə təşəkkürünü bildirib.
Vəfa Abbasova Gəncə Şəhər İcra Hakimiyyətinin başçısı Niyazi Bayramovun təhsil işçilərinə təbriklərini çatdırıb. O qeyd edib ki, Beynəlxalq Müəllimlər günü həyatını xalqın işıqlı gələcəyinə həsr edən müqəddəs peşə sahiblərinin bayramıdır. Cəmiyyətin formalaşmasında müəllimlərin rolunun əvəzsiz olduğunu bildirən Vəfa Abbasova ümummilli lider Heydər Əliyevin Azərbaycana rəhbərlik etdiyi bütün illərdə müəllim əməyini yüksək qiymətləndirdiyini, onlara böyük hörmətlə yanaşdığını dilə gətirib. Bu gün isə xalq bu diqqət və qayğını ölkə rəhbəri İlham Əliyev və Birinci Vitse Prezident Mehriban Əliyevadan gördüyünü vurğulayan birinci müavin təhsil işçilərini təbrik edərək onlara işlərində müvəffəqiyyətlər arzu edib.
Sonra “İlin ən yaxşı” müəllimi nominasiyasında qalib gələn Elvin Bəşirov çıxış edərək, müəllimlərə yaradılan yüksək şəraitə görə ölkə rəhbərinə təşəkkürünü bildirib. O, bir pedaqoq kimi Gəncə təhsilinin inkişafına tövhələr verməyə davam edəcəyini söz verib.
Zakir Hüseynov Prezident İlham Əliyevin təhsil işçilərinə fəxri adların verilməsi haqqında imzaladığı sərəncama əsasən “Tərəqqi medalı” ilə təltif olunan Sevinc Ələkbərovanı, Samir Həbiblini və “Əməkdar müəllim” adına layiq görülən Aybəniz Möhsümovanı təbrik edib.
Tədbirin sonunda şəhər təhsil idarəsinin müdiri 5 oktyabr ‘Beynəlxalq Müəllimlər Günü’ münasibəti və gənc nəslin təlim-tərbiyyəsində göstərdiyi xidmətə görə bir qrup təhsil işçisini “Fəxri Fərman”la təltif edib.
